Jamalia Syed Khaleel Awn Moulana

Tuesday, January 6, 2015

அப்பாஸியாக்கள்

இஸ்லாமிய ஆட்சியின் பொற்காலம் அப்பாஸியாக்களின் ஆட்சிக்காலம் என வரலாற்று ஆசிரியர்களால் வர்ணிக்கப்படுகிறது.
அப்பாஸிய ஆட்சிக்காலத்தில் இஸ்லாமிய ஆட்சி விஸ்திரமாக விரிவுபடுத்தப்பட்டது, மொழி, கலை, இலக்கியம், பண்பாட்டின் உச்சத்தைத் தொட்டது, மொழிபெயர்ப்பு நூற்கள், தர்க்க நூற்கள்,போதனை நூற்கள், வருணனை நூற்கள், கதை நூற்கள், வரி செலுத்துதல் செலவுசெய்தல், குற்றவாளி, தண்டனை பற்றிய நூற்கள் என வாழ்வின் அத்தனை அம்சங்களையும் பிரதிபலிக்கும் நூற்கள் இயற்றப்பட்டன.
மாபெரும் கவிஞர்கள், சொற்பொழிவாளர்கள், அறிவியலாளர்கள், ஆராய்ச்சியாளர்கள், விரிவுரையாளர்கள் தோன்றினர்.
புதிய புதிய கண்டுபிடிப்புக்கள் அப்பாஸியாக்களின் ஆட்சிக்காலத்தில் கண்டுபிடிக்கப்பட்டன. இரசாயனம், மருத்துவம், விண்ணியல் என அனைத்துத் துறைகளிலும் முஸ்லிம்கள் முன்னோடிகளாக விளங்கினர். பிக்ஹு எனும் மார்க்க சட்ட அறிவின் மூலமாகிய மத்ஹபுகளும் அக்காலத்தில்தான் முழுவடிவம் பெற்றது.
உலகின் எந்த விஷயத்தையும் முடிவு செய்யும் முக்கிய கேந்திரமாக இன்று அமேரிக்கா இருப்பது போல அன்று பக்தாது(ஈராக்) விளங்கியது.
கி.பி. 750 முதல் 1258 வரை ஆட்சி புரிந்த அப்பாஸிய ஆட்ச்சியின் உன்னத மேன்மையை உரிய முறையில் பதிவு செய்திருக்கிறார்கள் இதன் ஆசிரியர் ஜமாலிய்யா ஸெய்யித் கலீல் அவ்ன் மௌலானா அவர்கள்.

-Hisam Hijas

ஹகாஇகுஸ் ஸபா (பரமார்த்தத் தெளிவு )

மனிதன் மனிதனாய் வாழ வேண்டுமானால், தன்னிடத்தேயுள்ள மிருகத்தன்மையை நீக்கி நல்லெண்ணத்தை உள்ளத்தில் பதியச்செய்ய வேண்டுமானால் தானும் உள்ளமை, தன்னைச் சூழ உள்ளவைகளும் உள்ளமை என்பதை உள்ளார உணரவேண்டும். அவன் தன்னை யாரென அறிந்து கொள்ள வேண்டும். அதனை விளக்க வந்த தெள்ளிய நூலே ஹகாஇகுஸ் ஸபா எனும் நூல். இந்நூல் ஏகத்துவ ஞானக்கலை விளக்கத்திற்கு ஒரு சிறந்த நூல். ஹகாஇகுஸ் ஸபா என்பதன் கருத்து பரமார்த்தத் தெளிவு என்பதாகும்.
இந்நூலின் மூல நூல் பூர்பி மொழியில் கவிதைத் திரட்டாக இயற்றப்பட்ட “மன்லகன்” என்பதாகும். இம்மூல நூலின் ஆசிரியர் ஹஸ்ரத் மௌலானா மஹ்மூதுல் பஹ்ரி ரலியல்லாஹு அன்ஹு அவர்களாகும். மன்லகன் என்ற நூலை மூலமாகக் கொண்டு நாகூர் ஷரீபைச் சேர்ந்த ஹஸ்ரத் மௌலானா சாஹிப் என்ற ஷாஹ் முஹம்மது கௌது சாஹிப் அவர்கள் அரபுத் தமிழில் - ஹகாஇகுஸ் சபா என்னும் நூலை எழுதினார். இதனை ம.மு. மஸ்தான் லெப்பை அவர்கள் தமிழில் எழுதி வெளியிட்டார்.
மெய்ஞ்ஞானத்தைத் சரியாக அறிமுகப்படுத்தும் இந்நூல் பல பக்கங்களைக் கொண்டு பெரிதாக இருப்பதாலும் சில இடங்களில் விளக்கமும் – தெளிவும் அவசியம் தேவைப்பட்டதாலும் ஆத்மா குருநாதர், நபிகளாரின் திருப்பேரர், ஜமாலிய்யா ஸெய்யித் கலீல் அவ்ன் மௌலானா அவர்களிடம் தெளிவுரை எழுதித்தர வேண்டுமென அவர்களின் முரீதீன்கள் வேண்டிக் கொண்டதற்க்கிணங்க அழகிய விளக்கமும்- தெளிவுரையும் எழுதி வெளிவந்திருக்கும் நூலே ஹகாஇகுஸ் ஸபா (பரமார்த்தத் தெளிவு) எனும் நூலாகும்.

-Hisam Hijas

Monday, January 5, 2015

ஜமாலிய்யா ஸெய்யித் கலீல் அவ்ன் மௌலானா அவர்கள் வழங்கிய நேர்காணல்

இலக்கியமே ஓர் ஆழி

பிரபல எழுத்தாளர் ஜமாலிய்யா ஸெய்யித் கலீல் அவ்ன் மௌலானா அவர்கள் வழங்கிய நேர்காணல்

நேர்கண்டவர் : முகமது ஹிஜாஸ்

இலக்கியமே ஓர் ஆழி,அதிற் கரை காண்டலில் விழைதலே அறிஞர் கடன். இலக்கிய மின்றேல் எதனினும் இன்பம் இராது. ஜமாலிய்யா ஸெய்யித் கலீல் அவ்ன் மௌலானா அவர்கள் தெரிவிக்கின்றார்கள். ஜமாலிய்யா ஸெய்யித் கலீல் அவ்ன் மௌலானா அவர்கள் இளம் வயதிலேயே திருக்குர்ஆனை முழுவதுமாக ஓதிமுடித்து விட்டார்கள். திருக்குர்ஆன் ஓத தொடங்கியது முதல் மற்ற எல்லா அரபுக் கலைகளையும் அருமைத் தந்தையாரான ஜமாலிய்யா ஸெய்யித் யாஸீன் மௌலானாவிடமே முறைப்படி கற்றுத் தேர்ந்தார்கள். அதே போன்று வாழ்க்கைப் பாடத்தையும் தம் தந்தையாரிடமே முறையாகக் கற்று சன்மார்க்க ஞானமேதையாகவும் தமிழ்ப் புலவராகவும் திகழ்கிறார்கள்.
s.s.c. தேர்வுக்குப் பிறகு இரண்டு ஆண்டுகள் ஆங்கில ஆசிரியராகப் பணிபுரிந்துள்ளார்கள். பின்னர் காலி என்னும் ஊரில் அரசினர் ஆசிரியர் பயிற்சிக் கலாசாலையில் கல்வியைப் பூர்த்தி செய்த இவர் தமிழ் மொழி, அரபு மொழி, இஸ்லாமிய நாகரிகம் போன்ற பாடங்களைப் போதித்து பின்னர் அதிபராகவும், வட்டாரக் கல்வி அதிகாரியாகவும் கல்வி அதிகாரியாகவும் பணிபுரிந்து விருப்ப ஓய்வு பெற்றுக்கொண்டார்கள் . அரபு மற்றும் தமிழ் ஆகிய இரு மொழிகளிலும் சம பாண்டித்தியம் பெற்றுள்ள கலீல் அவ்ன் மௌலானா அவர்கள் நடமாடும் பல்கலைக்கழகம் என்றால் அது மிகையாகாது. தமிழ் மொழிக்கும் இலக்கியத்துக்கும், இஸ்லாமிய இலக்கியத்துக்கும், தன்னை அறியும் மெய்ஞானத்துக்கும் இவர் ஈழத்தின் ஒரு மூலையிலிருந்து கொண்டு தனது 77ஆவது வயதிலும் ஆரவாரமின்றி அழகுதமிழ்ப் பணியாற்றிக் கொண்டிருக்கும் அவர்கள் சங்கமத்துக்கு வழங்கிய நேர்காணலில் பின்வருமாறு குறிப்பிட்டுள்ளார்.

இலங்கை எழுத்தாளர்களுடன் அல்லாது இந்திய எழுத்தாளர்களுடன் இணைந்து செயற்பட காரணம் என்ன?

இலங்கையில் கதவு தாழிடப்பட்டிருந்தது. புகுத முடியவில்லை. எனினும் இந்தியாவில் கதவு விரியத் திறக்கப்பட்டிருந்தது. அங்கு புகுதலில் எளிது கண்டேன். அதனாலேயே நாம் எழுதும் நூல்களனைத்தும் அங்கேயே அச்சிடப்பட்டன, அச்சிடப்பட்டுக் கொண்டிருக்கின்றன. அங்கு அதிக வரவேற்பு இருந்தது. இதனாலேயே இந்திய எழுத்தாளர்களுடன் இணைந்து செயற்படக் காரணமாயிற்றென்பேன்.

ஆரம்பகால இலக்கியத்துக்கும் தற்கால இலக்கியத்துக்கும் எவ்வாறான வேறுபாடு காணப்படுகின்றது.?

எமது ஆரம்பகால இலக்கியம் சங்க கால இலக்கிய நூல்களுடன் தொடர்புடைத்து. எமது வயது பதினேழுக்கு மேல் மரபுக் கவிதைகள் எழுதுவதில் மிக்கார்வங்கொண்டு எழுதி வந்தோம். அன்றிலிருந்து இன்று வரை எழுதப்படும் பாக்கள் யாவும் யாப்பிலக்கண அமைவு கொண்டுள்ளமையால் அன்றும் இன்றும் தரத்தில் ஒரே நிலை கொண்டது. யாப்பிலக்கண ஒழுங்கு முறைப்படியே புதுப்பாக்களையும் எழுதுவோம். பாட்டுக்கு எதுகையும் மோனையும் உயிர் போன்றவை. யாப்பிலக்கண வழுவின்றி பா வமைத்தலையே புலவர்கள் விரும்புவார்கள். முன்னை விட இப்போது யாத்துவரும் இலக்கிய நூல்கள் மிக்கன. (அதிகம்)

நீங்கள் துறவற நிலைக்கு .செல்ல வேண்டி ஏற்பட்டதன் காரணம் என்ன?

எம் குடும்பத்து முன்னோர்களில் அதிகம் பேர் இல்லத்துறவு பூண்டவர்களே. வாழ்க்கையோடு சம்பந்தப்பட்ட துறவு எனின் சாலும். எமது துறவறம் இல்ல மனையாளையும் பிள்ளையையும் துறந்து கானகமேகுவதன்று. இதனையே நாம் இல்லத்துறவு என்போம்.

எவ்வாறான புத்தகங்களை எழுதுவதற்கு நாட்டம் கொள்வீர்கள்? இதுவரை எத்தனை நூல்களை எழுதியுள்ளீர்கள்?

புராணங்கள், கவிதைகள் முதலான இவையாவும் யாப்பிலக்கண அமைவோடு அமைவதையே நாம் விரும்புகிறோம். புது வகைக் கவிதைகள் (பாரதியார் எழுதிய கவிதைகளைப் பின்பற்றியும்) நூல்கள் எழுதியுள்ளோம். இப்போது உமர் (ரலி) புராணம் எனும் பெயருடன் ஒரு புராணம் எழுதிவருகிறோம். ஓரிலக்கண நூலும் எழுதிவருகிறோம். யாப்பிலும் ஒருவிளக்க நூல் எழுதுகிறோம். இது வரை இருபது நூல்களுக்குமேல் எழுதியுள்ளோம் . இன்னும் பல நூல்கள் அச்சிடற்குள்ளன.

இவ்வளவு காலம் இலக்கியத்துறையில் இருந்தும் நீங்கள் வெளியுலகிற்கு வராமல் இருந்ததற்கான காரணம் என்ன?

முன்னர் ௦2 இலும் இதுபற்றி எழுதியுள்ளோம். பகைவரும் பொறாமைக்காரரும் இதற்குத் தடைக்கல்லாயமைந்திருப்பர் எனக்கருதுகிறோம்.
சாதாரணமாக எழுத்தாளர் ஒருவரின் பணி எவ்வாறு இருக்க வேண்டும் என்று கருதுகின்றீர்கள்?
நம்பணி பணத்துக்காக வெனக் கருதாதிருத்தல் வேண்டும். பெருமைக் கெழுதாமல் இலக்கியங்களுக்கு ஏற்ற தரத்தில் எழுதல் வேண்டும். சங்ககால இலக்கியத்துக்கு அதன் தரத்திற்கமைந்த நடையில் எழுதல் வேண்டும். எதை எவர் வாசிக்கிறாரோ அவருக்கது பொருத்தமான நடையாக அமைவது சிறந்தது. சிறந்த இலக்கியத்தை பத்திரிகைத் தமிழுடன் கலத்தல் நல்லதன்று என்பது எம்கருத்து. எதை எவர் விரும்புகிறாரோ அதற்கேற்ற விளக்கம் அதில் இருத்தல் வேண்டும்.

இளம் எழுத்தாளர்களுக்கு நீங்கள் கூறவிரும்புவது என்ன?

மனங்களுக்கேற்ற புதுப்புது கல்வியைத்தரும் கலைத்துறைக்குகந்த நல்ல விடயங்களை எழுதல் அவசியம். பார்த்ததையே பார்த்து பிரதிபன்ணாமல் மனதுக்கேற்ற நல்ல புதுவிடயங்களை எழுத்தாளர்கள் அமைத்துக் கொள்ளல் வேண்டும். நல்ல இலக்கியச் சொற்களை அமைத்துக்கொள்ளல் வேண்டும். சொல்லாராய்ச்சியோடு எழுதல் வேண்டும். பல்லுடைக்கும் தமிழ் என்றெல்லாம் கூறி கம்பராமாயணம், சீறா புராணம் முதலான மற்றும் சங்ககால இலக்கிய நூல்களை உதாசீனம் செய்யாதிருத்தல் வேண்டும். ஆயின் சொல்வளர்ச்சி குன்றி தாயினும் தந்தையினும் பேச்சு வழக்குகள் எம்மில் ஊன்றிவிடும். அதனை எளிய தமிழெனவும் சொல்ல முடியாது. கொச்சைத் தமிழ் வழக்கில் அது அமைந்துவிடும். இவையெல்லாம் கவனித்து எழுதுதலே இலக்கணத்துக்கும் இலக்கியத்துக்கும் தொண்டு செய்தல் எனவாகும்.

நீங்கள் வெளியிட்டுள்ள புத்தகங்கள் பற்றி-?

மகானந்தாலங்கார மாலை – (சித்திரக் கவிதை)
ஈழவள நாட்டிற் பயிர் பெருக்க வாரீர். (இலங்கை சாகித்திய மன்றத்தில் பரிசு பெற்றது) பேரின்பப் பாதை (ஞான விளக்கம் தமிழில்) மனிதா! (அமுத மொழித் தொகுப்பு) கஸீததுல் அஹ்மதிய்யா (அரபு தமிழ் வாரிதாது பாக்கள்), தாகிபிரபம் (ஞான விளக்கம்), இறையருட்பா (ஞானக் கவிதைகள்), அற்புத அகில நாதர் (கவிதை), நாயகர் பன்னிரு பாடல் (கவிதை), அவன் நாயகர் அருள் மொழிக் கோவை (ஆங்கிலம்,தமிழ்) பத்று மௌலிது (அரபு மூலம் தமிழ் மொழிபெயர்ப்பு), பர்சன்ஜி மௌலித் (அரபு மூலம் தமிழ் மொழிபெயர்ப்பு), துஹ்பதுல் முர்ஸலா (அரபு மூலம் தமிழ் மொழிபெயர்ப்பும் விளக்கமும்.), றிஸாலத்துல் கௌதிய்யா (தமிழ் மொழிபெயர்ப்பும் விளக்கமும்.) ஹகாயிகுஸ் ஸபா (பரமார்த்தத் தெளிவு ), மருள் நீக்கிய மாநபி , நபி வழி நம் வழி ,ஒளியை மறைக்க துணியும் தூசு இறைவலிய் ஸய்யிது முஹம்மது மௌலானா (கவிதை), உண்மை விளக்கம், குறிஞ்சிச் சுவை ஆகிய நூல்களை எழுதியுள்ளார். அது மாத்திரம் அல்ல அடுத்தவருட முதற் பகுதியில் நூல்களை வெளியிடவும் உள்ளார்கள்.

Friday, December 26, 2014

Meelad Un Nabi Celebrations at Weligama, Sri lanka.

All are Invited.

Video grab from the WEBCAST of the celebrations of Meelad @ Weligama

Tuesday, September 16, 2014

Quthbul Akthaab Jamaliya Syed Yaaseen Moulana Al Hassaniyyul Husseiniyul Hashimiyee Nayagam's 50th Kandhoori

அவ்னியா உலக அமைதி அறக்கட்டளை மற்றும் ஏகத்துவ மெய்ஞ்ஞான சபை சார்பில் திருமுல்லைவாசலிலுள்ள பரிசுத்த அவதார சந்நிதானமும் ஈருலக ரட்சகர் முஹம்மது முஸ்தபா ரஸூலே கறீம் ஸல்லல்லாஹு அலைஹிவஸ்ஸல்லாம் அவர்களின் உள்ரங்க வெளிரங்க வாரிசும், கௌதுல் அஉளம் முஹிய்யுத்தீன் ஆண்டகை (ரலி) அவர்களின் சம்பூர்ண பிரதிநிதியும், காலத்தின் இமாமும் ஆத்மா ஞான குருநாதருமான குத்புல் அக்தாப் ஜமாலிய்யா செய்யிது யாஸீன் மௌலானா அல்ஹஸனிய்யுல் ஹாஷிமிய் (ரலி) அவர்களின் 50 வது புனித கந்தூரி ஜியாரத் விழா 12.09.2012 வெள்ளி மாலை சனி இரவு (ஹிஜ்ரி 1435 துல்கஹ்தா பிறை 17 ) புனித ராத்திபு மஜ்லீஸ் மற்றும் சிறப்பு நிகழ்ச்சிகளுடன் மிகவும் சிறப்பாகவும் நேர்த்தியாகவும் நடைபெற்றது.

வெளிநாடுகளிலிருந்தும், பல்வேறு ஊர்களில் இருந்தும் வந்திருந்த அவ்னியா உலக அமைதி அறக்கட்டளை மற்றும் ஏகத்துவ மெய்ஞ்ஞான சபை உறுப்பினர்களும், கலீபா பெருமக்களும், உள்ளூர் மக்களும் கலந்து கொண்டு விழாவினை சிறப்பித்தனர்.

கலந்துகொண்ட அனைத்து முரீதுகளுக்கும், ஏழை எளிய மக்களுக்கும், சிறுவர்களுக்கும் கந்தூரி தப்ரூக் உணவு வழங்கப்பட்டது. கலந்து கொண்ட அனைத்து ஊர் முரீதீன்கள், அஹ்பாபுகள், பக்தர்கள் அனைவரும் ஞானமகானின் அருளும் ஆசியும் ஈருலக நற்பேறுகளையும் இறைவனின் கருணையால் பெற்றுக்கொண்டார்கள்.

ஆத்ம ஞானச்சுடர், குத்புல் அக்தாப் ஜமாலிய்யா செய்யிது யாஸீன் மௌலானா அல்ஹஸனிய்யுல் ஹாஷிமிய் (ரலி) அவர்கள் முஹம்மது நபி (ஸல்) அவர்களின் 33வது வழித்தோன்றலும் முஹிய்யுத்தீன் ஆண்டகை (ரலி) அவர்களின் 19வது வழித்தோன்றலும் ஆவார்கள். குத்புல் அக்தாப் என்று எல்லோராலும் அன்பாகப்போற்றப்படும் இவர்கள் ஞான பூமியான இந்தியாவில் பல ஊர்களுக்கும் சென்று பலருக்கும் ஞானதீட்சை அருளி இறுதியில் திருமுல்லைவாசலில் மறைந்து இன்றும் வாழ்ந்து மக்களுக்கு அருள் மழை பொழிந்து வருகிறார்கள்.

அவ்னியா உலக அமைதி அறக்கட்டளை மற்றும் ஏகத்துவ மெய்ஞ்ஞான சபை, உலகம் முழுவதும் ஏழை எளியவர்களுக்கும் அனாதைகளுக்கும் உதவி புரிவதில் முன்னணியில் இருந்து வருகிறது. மேலும் ஏகத்துவ மெய்ஞ்ஞான சபை திருச்சியில் ஏழை மற்றும் அனாதை குழந்தைகளுக்கான ஒரு மதரசாவை முற்றிலும் இலவசமாக நடத்திவருகிறது. இந்த மதரசாவில் உள்ள நூற்றுக்கும் மேற்பட்ட மாணவர்களுக்கு இஸ்லாமியக்கல்வியுடன், பள்ளி மற்றும் பட்டப்படிப்பிற்கான வசதிகளுடன் தொழிற்கல்வி மற்றும் கம்ப்யூட்டர் கல்வியும் கற்றுத்தரப்படுகிறது.

இந்த ஆன்மீக, மனித நேய, சமுதாய நல்லிணக்க இயக்கத்தின் ஸ்தாபகரும் ஆன்மீக ஞான குருவுமாகிய முஹம்மது நபி ஸல்லல்லாஹு அலைஹிவஸ்ஸல்லாம் அவர்களின் உள்ரங்க வெளிரங்க வாரிசும், குத்புல் அக்தாப் ஜமாலிய்யா செய்யிது யாஸீன் மௌலானா அல்ஹஸனிய்யுல் ஹாஷிமிய் (ரலி) அவர்களின் வாரிசுமான ஷெய்குள் காமில் குதுபுஸ்ஸமான் ஷம்சுல் வுஜுது ஜமாலிய்யா செய்யது கலீல் அவ்ன் மௌலான அல்ஹஸனியுள் ஹுஸைனியுள் ஹாஷிமிய் நாயகம் அவர்களின் வழி காட்டுதலின்படி இந்த சமுதயப்பணிகள் சிறப்பாக நடைபெற்றுவருகின்றன.

50 வது ஆண்டு கந்தூரி ஜியாரத் பொன் விழா சிறப்பு நூல் வெளியீட்டு விழாவும், இறை அருட்பா குறுந்தகடு வெளியீட்டு விழாவும் சிறப்பாக நடைபெற்றது. விழாவில் ஷேக் அப்துல்லாஹ் ஜமாலி அவர்களும் சிறப்புரை ஆற்றினார். மௌலவி தளபதி ஏ. ஷபீகுர் ரஹ்மான் இந்திய யூனியன் முஸ்லிம் லீக் அவர்களும் சிறப்புரை ஆற்றினார்.

முக்கிய நிகழ்வுகள்

நிகழ்ச்சியின் துவக்கம்
பர்ஸன்ஸி மௌலிது
50ம் ஆண்டு பொன்விழா சிறப்பு மலர் வெளியீடு
இறையருட்பா இசைத்தட்டு வெளியீடு
தந்தை நாயகத்தைப் பற்றிய சிறப்பான உரை மௌலவி ஹாபிழ் எம்.ஷேக்அப்துல்லாஹ் ஜமாலிய் எம்.ஏ. அவர்கள்
மஃஹ்ரிப் தொழுகைக்குப் பின் இராத்திபத்துல் காதிரிய்யா

Sunday, August 31, 2014

Irai Arutpaa CD release function In Malaysia on 30.08. 2014

His Holiness' Birthday Celebrations in Chennai, 24 August 2014

அவ்னியா உலக அமைதி அறக்கட்டளை, தரீக்கதுல் ஹக்கிய்யதுல் காதிரிய்யா மற்றும் ஏகத்துவ மெய்ஞ்ஞான சபை சென்னை சார்பில் பரிசுத்த அவதார சந்நிதானமும் ஈருலக ரட்சகர் முஹம்மது முஸ்தபா ரஸூலே கறீம் ஸல்லல்லாஹு அலைஹிவஸ்ஸல்லாம் அவர்களின் உள்ரங்க வெளிரங்க வாரிசும், கௌதுல் அஉளம் முஹிய்யுத்தீன் ஆண்டகை (ரலி) அவர்களின் சம்பூர்ண பிரதிநிதியும், காலத்தின் இமாமும் ஆத்மா ஞான குருநாதருமான ஷெய்குள் காமில் குதுபுஸ்ஸமான் ஷம்சுல் வுஜுது ஜமாலிய்யா செய்யது கலீல் அவ்ன் மௌலானா அல்ஹஸனியுள் ஹுஸைனியுள் ஹாஷிமிய் நாயகம் அவர்களின் 79 வது புனித உதய தின விழா நிகழ்ச்சிகள் 24.08.2014 ஞாயிற்றுக்கிழமை அன்று காலை 9:00 மணி முதல் மதியம் 2:00 மணி வரை சென்னை மூர் தெருவில்( G.P.O. பின் புறம் ) உள்ள ஹோட்டல் இந்தியன் பேலஸில் மிகவும் சிறப்பாக நடைபெற்றது.

Er. ஹைதர் நிஜாம் ஹக்கிய்யுல் காதிரிய், சென்னை வரவேற்புரையாற்றினார்.

Er. Dr. முஹையதீன் Ph.D., ஹக்கிய்யுல் காதிரிய் சென்னை அவர்கள் தலைமையில், ஆன்மீக கருத்தரங்கம் நடைபெற்றதுடன் மெய்ஞ்ஞான கீதங்களும் பாடப்பட்டன.

கருத்தரங்கத்தில் கலீபா. ஸதக்கத்துல்லாஹ் ஹக்கிய்யுல் காதிரிய் ஈரோடு,
ஜனாப் டி. மகதூம் ஜான் எம். ஏ., பி. எட்., ஹக்கிய்யுல் காதிரிய் (முதல்வர், மதரஸதுல் ஹஸனைன் ஃபி ஜாமிஆ யாஸீன், திருச்சி ),

அட்வகேட். மீர் ஜாவித்,ஹக்கிய்யுல் காதிரிய் சென்னை,
மௌலவி என். ஸயீத் முஹம்மது ஆலிம் மிஸ்பாஹி (பேராசிரியர், மதரஸதுல் ஹஸனைன் ஃபி ஜாமிஆ யாஸீன், திருச்சி),
ஜனாப். அப்துர் ரவுஃப் ஜின்னா ஹக்கிய்யுல் காதிரிய், மதுரை,

ஜனாப். ஏ. பஷீர் அஹமது ஹக்கிய்யுல் காதிரிய், கொச்சின்,

ஜனாப். கிளியனூர் இஸ்மத் ஹக்கிய்யுல் காதிரிய், சென்னை ஆகியோர் கலந்து கொண்டு சிறப்புரையாற்றினர்.

ஜனாப். எஸ். பி. ஆஸிஃப் ஹக்கிய்யுல் காதிரிய், சென்னை மற்றும் ஆத்மா சகோதரர்கள் மெய்ஞ்ஞான கீதங்கள் பாடினர்.

ஜனாப்.முஹம்மது ஸலாஹுதீன் ஹக்கிய்யுல் காதிரிய், சென்னை நன்றியுரை வழங்கினார்.

லுஹர் தொழுகைக்குப்பின் துஆ ஓதப்பட்டது. கலந்துகொண்ட அனைத்து முரீதுகளுக்கும், ஏழை எளிய மக்களுக்கும், சிறுவர்களுக்கும் தப்ரூக் உணவு வழங்கப்பட்டது. கலந்து கொண்ட அனைத்து ஊர் முரீதீன்கள், அஹ்பாபுகள், பக்தர்கள் அனைவரும் ஞானமகானின் அருளும் ஆசியும் ஈருலக நற்பேறுகளையும் இறைவனின் கருணையால் பெற்றுக்கொண்டார்கள்.